Hexagon Valbeinn

Hexagon Valbeinn 1/4″

Hér er komin önnur smátúba, þyngd með hexagon haus.  Og þessi er ekki af lakari gerðinni því þetta er Valbeinn.

Valbeinn kom eins og stormsveipur á markaðinn fyrir fáeinum árum enda mjög veiðin fluga.  Valbein hannaði Þorbjörn Helgi, betur þekktur sem Reiða öndin.

Það má segja að fjarskyldur ættingi Valbeins sé ákveðið afbrigði Sunray Shadow sem Henrik Kassow Andersen gerði fyrir ríflega 20 árum en Henrik starfaði þá sem veiðileiðsögumaður í Rangánum báðum.  Útfærsla Henrik á Sunray gekk undir nafninu HKA Sunray sem einnig hefur stundum verið kölluð Bismó og þá kennd við annan hnýtara og veiðimann, Skúla Kristinsson.

Valbeinn hefur svo sannarlega sannað sig síðustu árin, ekki síst hnýttur á skáskorið 1″ langt plaströr.  Þessi útfærsla, hnýtt á stutt og mjótt rör með hexagon haus er einnig gríðarlega skæð.

Góða skemmtun í sumar.