Fyrsti túrinn oft lærdómsferli

„Já. Það er mjög gott að byrja þar. Þægilegur staður bæði upp á veiðina sjálfa og einnig allan aðbúnað. Við byrjum á að kynna fólk fyrir Bonefish. Hvernig á að setja í þá og takast á við þá. Svo eru það hinar tegundirnar. Triggerfish, Milkfisk og við köstum á Barracuda og Giant Trevally. Á grynningunum köstum við á nokkrar tegundir af Triggerfish og svo er það Permit. Við förum líka lengra út og þá á bátum og reynum við enn fleiri tegundir. Það er mikið að læra og taka inn þegar fólk kemur í fyrsta skipti. Við réttu skilyrðin getum við alveg lent í því að landa öllum þessum tegundum sem ég nefndi áðan. Það eru náttúrulega frábærir dagar þegar það gerist. Ég held að fyrir flesta sem eru að koma í fyrsta skipti til Seychelleseyja þá er fyrsti túrinn í raun og veru lærdómsferð. Það er svo margt sem þarf að hugsa um og hvernig þú tekst á við ólíkar tegundir. Þarna eru leiðsögumennirnir okkar afar dýrmætir. En geta veiðimannsins skiptir líka máli. Þú þarft að geta kastað og vera tilbúinn að taka við leiðbeiningum og upplýsingum frá leiðsögumanninum. Sérstaklega fyrstu dagana. Megnið af veiðinni hjá okkur er sjónveiði. Þú sérð fisk, eða leiðsögumaðurinn bendir þér á fisk og þú kastar á hann. Í fyrstu ferðinni þinni getur þú ekki búist við því að setja í þá alla. Flestir sem eru að byrja í saltveiði hafa ekki þekkinguna til að gera það. Svo lærir fólk og þá verður þetta enn meira spennandi. Að sjá þá koma og taka og kunna að bregðast við. Það sem er alveg á hreinu er að við munum koma þér í færi við fullt af fiski.“

Það gildir það sama um Seychelles­eyjar og aðra áfangastaði veiðimanna. Það er mikilvægt að vera búinn að ná tökum á fluguveiði áður en farið er á slíkar slóðir. „Við höfum fengið fólk sem kann lítið og býst hreinlega við því að fiskurinn bara stökkvi á fluguna. En þú verður að geta kastað svo að eitthvað gerist. Það gildir það sama hér hjá okkur og væntanlega á öllum veiðisvæðum. Vertu búinn að læra og tileinka þér grunnfærnina. Þá verður veiðitúrinn bæði skemmtilegri og árangursríkari.“

Veitt nánast allan heiminn

Keith Rose-Innes er afar reynslumikill þegar kemur að hvers konar veiðiskap. Hann kom fyrst til Seychelles 1994 og byrjaði í leiðsögn á svæðinu rétt fyrir aldamót. Hann hefur veitt allt sitt líf, svarar hann þegar hann er spurður hvenær hann hafi byrjað.

Hann hefur sannarlega farið um allt. Var leiðsögumaður við Ponoi ána á Kólaskaga í fjögur ár. Hann veiðir í Noregi á hverju ári og þar er Alta árlegur áfangastaður. Hann hefur farið um allt, bókstaflega eins og kom fram áður. Veitt nánast í öllum löndum Afríku og Mexíkó. Það er svona smá Hemingway blær yfir honum.

Lykilorðið er sjálfbærni

Nánast öllum fiski er sleppt aftur á Seychelles og það kemur fyrir að sami fiskurinn veiðist aftur. „Við erum með margskonar rannsóknir í gangi í samstarfi við vísindamenn. Stundum setjum við sérstakt merki í fiskinn, rétt undir roðið við bakuggann. Allir leiðsögumennirnir okkar eru með litla skanna þannig að þeir tékka á þessum fiskum hvort þeir hafi veiðst áður. Stundum kemur það fyrir að skanninn fær svörun, en það er ekki oft. Það er svo mikið af fiski þarna.“

Þegar Keith horfir til framtíðar þá segir hann að lykilorðið sé sjálfbærni og að ekki sé gengið á náttúruna með nokkrum hætti. „Okkar fyrsta markmið er að vanda okkur á þeim stöðum þar sem við erum nú þegar. Við erum hins vegar alltaf að skoða nýja staði og erum meðal annars í samstarfi við fyrirtækið African Waters sem skipuleggur veiðiferðir á framandi slóðir. Á þeirra lista er að finna veiðiferðir til Afríkuríkja á borð við Gabon, Lesotho í leit að Yellowfish, Suður-Afríku og Tansaníu að kasta á Tarpoon svo einhverjir staðir séu nefndir.

Arapaima og sjóbirtingur

En maður eins og Keith, sem er að verða fimmtugur. Er eitthvað sem hann á eftir að gera fyrir utan að koma til Íslands og Argentínu? Er einhver tegund sem hann dreymir um að veiða og hefur ekki enn landað?

„Já, já. Það eru nokkrar tegundir sem ég hef ekki veitt. Fyrsta sem mér dettur í hug er Arapaima. Mig langar virkilega að komast til að veiða hann í sínu náttúrulega umhverfi. Svo á ég eftir að veiða stóran sjóbirting. Ég hef veitt litla en langar að setja í svona alvöru eintak.“ Hann nefnir Argentínu sem vænlegan áfangastað fyrir sjóbirtingsveiði, en bætir við að hann hafi heyrt af slíkum ævintýrum líka á Íslandi. Þessi maður er með þetta allt kortlagt.

Taimen og Giant Trevally

Merkilegasti fiskur sem hann hefur veitt eða sá sem var erfiðast að ná í?

„Ég fór til Síberíu og veiddi nokkrar ár þar. Við vorum að leita að Taimen og við fengum fiska upp í hundrað pund. Það fannst mér ótrúlega magnað sérstaklega þegar maður horfir á þann fisk út frá staðsetningu og hvert við vorum komnir. En þegar maður talar um erfiðustu fiskana þá er það Giant Trevally. Ég fékk einu sinni einn sem mældist 136 sentímetrar. Það var svakalegur bardagi og þegar þú setur í slíkan fisk af stærri gerðinni eru það rosaleg átök. Þessir fiskar eru svo sterkir og sprettharðir að það þeir eiga engan sinn líkan.“ Svo stór GT eins og Keith landaði eru ekki algengir myndi maður halda. Keith mótmælir því og segir að töluvert sé um slíka fiska við Seychelles. Það sem er kannski merkilegt við metfiskinn hans er að sá fiskur veiddist á grunnsævi og Keith var búinn að sjá hann og kastaði á hann. Vanalega eru þessir stærstu að veiðast á dýpra vatni.

Stærsti skráði GT sem veiðst hefur á stöng í heiminum var um 170 sentimetrar og veiddist við Japan árið 2006. Sá fiskur mældist 72,6 kíló.

En hvað kostar svo að koma?

Keith segir að verðið sé mjög misjafnt og einn af þeim þáttum sem þar ráða upphæðinni er fjarlægð frá aðaleyjunni. Þess lengra sem er flogið þess hærra verður verðið. Að sama skapi er hægt að velja um misjafna gistiaðstöðu og það getur líka haft áhrif á verðið. „Pakkarnir okkar eru frá 15 þúsund dollurum og upp úr. Það er rétt að hafa í huga að inni í því er nánast allt. Gistingin, matur og allir drykkir, leiðsögumenn og aðgangur að öllum búnaði. Við erum að markaðssetja okkur sem fullreyndur áfangastaður með mikið af fiski og frábæru umhverfi. Við reynum að hafa allt upp á tíu okkar megin. Það eina sem getur í raun dregið úr þeirri upplifun sem við bjóðum upp á er viðskiptavinurinn sjálfur og svo auðvitað veðrið sem alltaf er óvissuþáttur í allri veiði.“

Og hvað kostar þetta svo?

Fimmtán þúsund dollarar eru í kringum 1,8 milljónir króna. Þá er eftir flugfarið. Ef við deilum þessu niður á þær sjö nætur sem dvalið er á áfangastað þá er sólahringurinn í kringum 265 þúsund krónur. Það er eins og gott laxveiðileyfi á Íslandi. Að vísu er matur innifalinn á Seychelles.

En vissulega er ferðalagið langt en ef einhver er með frekari spurningar í kringum þessa veiði og ferðalagið eða aðbúnað, þá erum við í Veiðihorninu búin að heimsækja flesta þessa staði og höfum veitt þarna oft. Ekki hika við að kíkja á okkur og forvitnast. Bara vara ykkur við áður en þið komið. Við erum ástfangin af þessari veiði.