Veiði, veiðiblað Veiðihornsins kom út síðastliðið vor, prentað á vandaðan pappír í 6.000 eintökum. Um er að ræða 12. árgang blaðsins en þar til nú hefur blaðið fyrst og fremst verið vörubæklingur með fróðleik og skemmtun í bland.
Í ár var tekin sú ákvörðun að breyta blaðinu í vandað tímarit og dreifa því frítt til viðskiptavina Veiðihornsins. Í raun eru blöðin tvö því í stað baksíðu voru forsíðurnar tvær þar sem önnur leiddi þig í skotveiðihluta blaðsins en hin í stangveiðihlutann.
Þessu nýja og glæsilega tímariti var svo vel tekið að það var orðið uppurið í byrjun hausts og fjölmargir hafa reynt að nálgast það síðan þá án árangurs. Nú eru bæði blöðin, það er skotveiðihlutinn og stangveiðihlutinn komin í rafrænan búning sem nálgast má hér …
VEIÐI XII – Stangveiðihluti VEIÐI XII – SkotveiðihlutiEfni blaðanna er afar fjölbreytt. Í skotveiðiblaðinu leiðbeinir Einar Páll Garðarsson með uppstillingu gervigæsa, Kjartan Lorange segir frá andaveiði í Ameríku, Ingvar Kristjánsson fjallar um skotveiði á Spáni, fjallað er um Skotfélag Suðurlands og Skotfélag Kópavogs, rætt er við Báru Einarsdóttur um veiðiferð vinkvenna til Eistlands og margt fleira.
Í stangveiðihluta VEIÐI XII er talað við Tarquin Millington Drake hjá Frontiers og Brian Gies hjá Fly Water Travel um stangveiði um allan heim, Viktor Burkni Pálsson segir frá veiðikeppni í Danmörku, fjallað er um veiðklúbbinn Árdísir, Kjartan Þorbjörnsson, Golli, gefur góð ráð varðandi myndatöku á veiðislóð, fjallað er um framleiðandann Semperfli sem framleiðir mikið úrval af fluguhnýtingaefni úr gerviefnum og skemmtilegt viðtal við veiðimanninn Gylfa Pálsson svo eitthvað sé nefnt.
Ljóst er að hér eru á ferð efnismikil og vönduð tímarit sem við vonum að veiðimönn líki vel við.
![](https://veidihornid.is/wp-content/uploads/2023/05/VEIDI-XII-2023-Group-772x800.jpg)
Þess má geta að undirbúningur að tímaritaútgáfu 2024 er hafinn og lofum við skemmtilegu blaði sem að sjálfsögðu verður dreift frítt til íslenskra veiðimanna.